Bent fær tækifæri

Sven-Göran Eriksson hefur látið í veðri vaka að Darren Bent, sóknarmaður Charlton, fái tækifæri með enska landsliðinu á morgun þegar liðið spilar æfingaleik við Úrúgvæ. Þá er búist við að Steven Gerrard verði í byrjunarliðinu og spili í það minnsta 45 mínútur, þrátt fyrir að Rafa Benitez segi hann þurfa hvíld.

"Ég get skilið að Rafa hafi áhyggjur af því að ég þurfi hvíld, en ég er mjög ferskur og mig langar að taka þátt í þessum leik, þar sem hann er þáttur í lokaundirbúningi landsliðsins fyrir HM. Það breytir engu hve marga leiki ég spila fram á sumarið - ég verð ferskur," sagði Steven Gerrard.