Kominn tími til að vinna Chelsea

Martin Jol hefur náð frábærum árangri með lið Tottenham síðan hann tók við því snemma á síðasta ári, en þrátt fyrir að liðið sé í baráttu um sæti í Meistaradeildinni um þessar mundir, hefur það enn ekki náð að vinna sigur á einu af stóru liðunum í stjórnartíð Hollendingsins.

"Við höfum í raun verið óheppnir gegn stóru liðunum, því við fengum löglegt mark dæmt af okkur gegn Manchester United á Old Trafford á síðustu leiktíð og eina tap okkar á heimavelli í vetur kom gegn Chelsea, þar sem við vorum manni færri allan leikinn. Það er því klárlega kominn tími fyrir okkur að fara að vinna leik gegn stórliðunum og það yrði stórt skref fyrir okkur í baráttunni," sagði Martin Jol, en hans menn sækja Chelsea heim um helgina.