Woods finnur sig vel á heimavellinum

Tiger Woods ætlar sér stóra hluti á hinu árlega Bay Hill Invitational móti í golfi sem fram fer um helgina. Woods hefur þegar unnið sigur á þremur mótum það sem af er þessu ári og hefur alls fjórum sinnum unnið sigur á Bay Hill mótinu. Það er líka skiljanlegt að Woods finni sig vel á vellinum, því hann býr aðeins í tíu mínútna fjarlægð frá mótsstaðnum.

"Það er alltaf gott að geta sofið í sínu eigin rúmi þegar maður er að keppa hérna og svo er það góður plús að Arnold Palmer skuli halda mótið, hann hefur gert svo mikið fyrir íþróttina," sagði Woods. Sjö af tíu bestu kylfingum heims eru skráðir til leiks á mótinu um helgina og verða því gerð góð skil á Sýn bæði á laugardag og sunnudag.