Methagnaður hjá Bakkavör

Bakkavör Group hf. skilaði 2,8 milljarða króna hagnaði á fyrstu sex mánuðum ársins og er það eftir 67 prósenta aukning á milli ára. Hagnaður félagsins á öðrum ársfjórðungi nam 2 milljörðum króna sem er 83 prósenta aukning frá sama tíma fyrir ári.

Í tilkynningu til Kauphallar Íslands kemur fram að sala félagsins á fyrri helmingi ársins nam 78,3 milljörðum króna. Þar af nam salan 42 milljörðum króna á öðrum ársfjórðungi.

Þá nam rekstrarhagnaður Bakkavarar 7,2 milljörðum króna á fyrstu sex mánuðum ársins, þar af 4,6 milljörðum á öðrum ársfjórðungi.

Hagnaður Bakkavarar fyrir skatta og fjármagnsliði (EBITDA) nam 9,6 milljörðum króna á fyrri helmingi ársins og er það 123 prósenta aukning á milli tímabila. Þá nam EBITDA 5,7 milljörðum króna á öðrum ársfjórðungi, sem er 82 prósenta aukning.

„Bakkavör Group skilar enn og aftur methagnaði á fyrstu sex mánuðum ársins. Afkoma félagsins í Bretlandi staðfestir leiðandi stöðu okkar á markaðinum sem við styrktum enn frekar með kaupunum á Laurens Patisseries og New Primebake. Afkoma félagsins á meginlandi Evrópu hefur batnað verulega á tímabilinu og við reiknum með að starfsemin þar muni styrkjast og vaxa í náinni framtíð," segir Ágúst Guðmundsson, forstjóri Bakkavarar Group hf., í tilkynningunni.