Mikilvægur sigur ÍBV - Keflavík lagði FH

Leikjunum þremur sem hófust klukkan 18 í Landsbankadeild karla er nú lokið. Eyjamenn unnu mikilvægan 2-1 sigur á Grindvíkingum í Eyjum, Keflvíkingar skelltu Íslandsmeisturunum 2-1 á heimavelli sínum og KRingar lögðu Blika 1-0 á útivelli. Leikur Vals og Víkings hefst nú klukkan 20.

Bo Henriksen og Ingi Rafn Ingibergsson skoruðu mörk ÍBV en Eysteinn Hauksson skoraði mark Grindvíkinga, sem voru manni fleiri lengst af í síðari hálfleik en náðu ekki að nýta sér liðsmuninn.

Keflvíkingar lögðu FH 2-1 suður með sjó. Baldur Sigurðsson skoraði bæði mörk heimamanna, en Atli Guðnason skoraði mark Hafnfirðinga.

Loks var mikill hasar í Kópavogi þar sem KR-ingar hirtu öll þrjú stigin með 1-0 sigri. Björgólfur Takefusa skoraði markið sem skildi að í fyrri hálfleik, en í þeim síðari fengu þeir Grétar Hjartarson og Sigmundur Kristjánsson hjá KR og hinn ungi Viktor Illugason hjá Breiðablik allir að líta rautt spjald.