Íraksstríðið jók hagnað BAE

Breska félagið BAE Systems (BAE), stærsti hergagnaframleiðandi í Evrópu,  skilaði 405 milljóna punda eða tæplega 54 milljarða íslenskra króna hagnaði á fyrstu sex mánuðum ársins. Þetta er 28 prósenta meiri hagnaður en á sama tíma í fyrra og umfram væntingar. Ástæðan eru aukin kaup bandaríska hersins á herbílum til nota í Írak.

Á sama tíma fyrir ári nam hagnaðurinn 317 milljónum punda eða rúmum 42 milljörðum króna. Greiningaraðilar bandarísku fréttaveitunnar Bloomberg bjuggust hins vegar við 354 milljóna punda eða 47 milljarða króna hagnaði.

Tekjur jukust um 21 prósent á tímabilinu og námu 8,21 milljarði punda.

BAE átti 20 prósenta hlut í EADS, móðurfélagi flugvélaframleiðandans Airbus, en ákvað fyrr í þessum mánuði að selja hann til móðurfélagsins vegna ítrekaðra tafa á framleiðslu A380 risafarþegaþotanna. Söluandvirði hlutanna verður notað til að styrkja framleiðslu félagsins frekar í stað þess að einblína á erfiða flugvélaframleiðslu, að sögn BAE.