Enronmaður bíður dóms

Dómur fellur í Houston í Texas í Bandaríkjunum í dag í máli Andrew Fastows, fyrrum fjármálastjóra bandaríska orkurisans Enron, vegna aðildar hans að fjár- og bókhaldssvikum, sem leiddu til gjaldþrots fyrirtæksins í lok árs 2001. Búist er við að hann hljóti allt að 10 ára fangelsisdóm vegna málsins.

Fastow viðurkenndi aðild að málinu fyrir tveimur og hálfu ári ásamt þeim Kenneth Lay, fyrrum forstjóra Enron, og Jeff Skilling, eins af æðstu yfirmönnum orkurisans. Lay lést í byrjun júlí en dómur fellur í máli Skillings í næsta mánuði.

Fastow var í fyrstu ákærður fyrir 98 atriði, þar á meðal bókhaldssvik, innherjasvik og peningaþvætti. Hann gekkst við tveimur ákæruliðum um aðild að bókhaldssvikum en þau fólu í sér að skuldir Enron voru faldar með það fyrir augum að láta sem fyrirtækið sýndi hagnað. Fastow auðgaðist við sölu á bréfum sínum í félaginu en hefur verið dæmdur til að greiða til baka 30 milljónir bandaríkjadala, jafnvirði rúmra 2.100 milljarða íslenskra króna, í reiðufé og eignum.