Stephen Jackson á leið í fangelsi?

Stephen Jackson, leikmaður Indiana Pacers í NBA deildinni, gæti nú átt yfir höfði sér fangelsisvist eftir að lögregla í Indianapolis ákvað í dag að kæra hann fyrir gáleysi og ólæti á almannafæri í kjölfar þess að hann lenti í átökum fyrir utan súlustað þar í borg á dögunum.

Jackson lenti í átökum fyrir utan skemmtistaðinn með þeim afleiðingum að einn þeirra sem hann lenti í útistöðum við ók á hann með bíl sínum. Jackson náði þá í skammbyssu og skaut nokkrum skotum út í loftið til að skakka leikinn. Nú hefur lögregla ákveðið að kæra hann fyrir þessa tilburði og þar sem Jackson er enn á skilorði eftir slagsmálin frægu í Detroit haustið 2004 - gæti leikmaðurinn átt yfir höfði sér að þurfa að dúsa í fangelsi í nokkra mánuði.

Forráðamenn Indiana hafa enn ekki viljað tjá sig um málið, en ljóst er að þetta er salt í sárin fyrir félagið, sem hefur tjaldað öllu til að hreinsa mannorðið eftir ólætin í Detroit forðum - og ekki síst eftir að félagið losaði sig við villinginn Ron Artest.