Verðbólga minnkaði innan OECD

Verðbólga innan aðildarríkja Efnahags- og framfarastofnunarinnar (OECD) mældist 2,1 prósent á ársgrundvelli í september samaborið við 3 prósent mánuðinn á undan. Verðbólgan er líkt og fyrri mánuði næstmest hér á landi.

Til samanburðar hækkaði verðbólga um 0,2 prósent á milli júlí og ágúst. Verðbólgulækkunin er að mestu tilkomin vegna lækkunar á raforkuverði.

Matvöruverð hækkaði á sama tíma um 3 prósent, sem er 0,3 prósentustigum meira en í ágúst.

Ef matvöru- og raforkuverð er undanskilið mælingunni mældist verðbólga á ársgrundvelli 2,2 prósent í semptember innan OECD, sem er óbreytt frá mánuðinum á undan.

Mesta verðbólgan mældist sem fyrr í Tyrklandi, 10,5 prósent á ársgrundvelli. Hún var næstmest á Íslandi á tímabilinu eða 7,6 prósent. Til samanburðar mældist verðbólgan á evrusvæðinu 1,8 prósent á ársgrundvelli í september sem er 0,4 prósenta lækkun á milli mánaða.