San Antonio - Cleveland í beinni á Sýn í kvöld

Leikur San Antonio Spurs og Cleveland Cavaliers verður sýndur í beinni útsendingu á sjónvarpsstöðinni Sýn í kvöld klukkan eitt eftir miðnætti. Bæði lið hafa spilað einn leik til þessa í deildinni og höfðu þau bæði sigur.

Lið Cleveland lagði Washington í hörkuleik í fyrrakvöld, en San Antonio lagði erkifjendur sína í Dallas á útivelli liðna nótt í leik sem sýndur var beint á NBA TV. Ljóst er að LeBron James og félagar í Cleveland eiga verðugt verkefni fyrir höndum í kvöld, því liðið hefur ekki unnið San Antonio á útivelli síðan árið 1988.

San Antonio vann upphafsleik sinn í deildinni tíunda árið í röð í nótt sem leið og ef liðið nær að leggja Cleveland í kvöld, verður það einnig tíunda árið í röð sem liðið vinnur fyrsta heimaleik sinn í deildarkeppninni. Phoenix og Minnesota hafa einnig unnið fyrsta heimaleik sinn 10 ár í röð og eru þetta þriðja lengsta sigurhrina í sögu NBA.