Phillips er velkominn aftur

Stuart Pearce, knattspyrnustjóri Manchester City, segir að Shaun Wright-Phillips sé alltaf velkominn aftur til Manchester City eftir 16 mánaða tilþrifalitla veru í herbúðum Englandsmeistara Chelsea. Breskir fjölmiðlar eru á því að Phillips verði seldur frá Chelsea í janúar og var hann síðast orðaður við West Ham.

"Ef settur væri hóflegur verðmiði á hann og Chelsea væri tilbúið að selja hann, held ég að það yrði mjög gaman fyrir alla hjá félaginu að sjá Shaun koma aftur heim. Það yrði líka frábært að sjá hann og Micah Richards spila á sama vallarhelmingi. Spurningin er bara hvort Chelsea vill selja hann og svo er það auðvitað ákvörðun stjórnarinnar hvort hún vill kaupa hann," sagði Pearce.