Arsenal hafði engan áhuga á að vinna leikinn

Jose Mourinho hrósaði sínum mönnum í Chelsea fyrir að ná að jafna metin gegn Arsenal eftir að hans menn höfðu lent undir á heimavelli í dag, en sagðist mjög hissa á því að Arsenal hefði mætt í leikinn án nokkurs áhuga á að reyna að vinna hann.

"Það var vissulega vel af sér vikið hjá stráknunum að ná að jafna leikinn eftir að lenda svona undir á heimavelli, en við fórum afar illa með fjölda dauðafæra. Allir sem sáu þennan leik sáu að við vorum eina liðið sem var að reyna að vinna leikinn og það kemur mér á óvart að Arsenal komi hingað 15 stigum á eftir toppliðinu og reyni ekki að ná í sigur. Það er eins og að liðið sé að segja að það vilji ekki vinna deildina. Ég er viss um að Alex Ferguson er ánægður núna og haldi því fram að við höfum tapað tveimur stigum í dag - en ef hann heldur að keppninni um titilinn sé lokið, er hann í vondum málum," sagði Mourinho.