Discovery á að lenda klukkan 22:32 í kvöld

Geimferðastofnun Bandaríkjanna, NASA, hefur ákveðið að geimskutlunni Discovery verði lent við höfuðstöðvar þeirra í Flórída klukkan 22:32 í kvöld. Fyrr í dag hafði lendingu hennar verið frestað vegna veðurs.

Geimskutlan hefur dólað úti í geimi lengur en hún átti að gera þar sem veðurskilyrði í Bandaríkjunum voru ekki ákjósanleg. Hugsanlegt hefði verið að lenda henni í Nýju-Mexíkó en það hefði kostað gríðarlega fjármuni þar sem þurft hefði að flytja búnað til þess að taka á móti henni og til þess að flytja hana til baka til Nýju-Mexíkó.

Geimskutlan var þar að auki að verða búin með eldsneyti sitt og hefur undanfarna daga sparað það mikið til þess að geta verið lengur úti í geimi. Rafkerfi geimskutlunnar er líka keyrt á þessum sömu eldsneytisbirgðum og hefði hún orðið að lenda á morgun, sama hvernig viðrað hefði, ef ekki hefði verið ákveðið að lenda henni í kvöld.