Frábiður sér gagnrýni

Nuri al-Maliki, forsætisráðherra Íraks, hótaði í dag að endurskoða samskipti við þau ríki sem gagnrýnt hafa aftöku Saddams Hussein, þar sem um íhlutun í írösk innanríkismál sé að ræða. George Bush hyggst senda liðsauka til Íraks en demókratar, sem nú eru í meirihluta á Bandaríkjaþingi, leggjast gegn því.

Ummælin lét forsætisráðherrann falla á samkomu sem haldin var í tilefni þess að 85 ár eru liðin frá stofnun íraska hersins. Í ræðu sinni sagðist hann frábiðja sér afskipti annarra ríkja af aftökunni á Saddam, ekki hefði verið um pólitíska ákvörðun að ræða heldur réttláta ákvörðun dómsstóla.

Maliki klykkti svo út með að hóta að endurskoða samskipti við þau ríki sem gagnrýnt hafa henginguna og sakaði þau um að blanda sér í írösk innanríkismál. Þar beindi hann orðum sínum meðal annars að Hosni Mubarak Egypalandsforseta sem í gær sagði aftökuna villimannslega og með henni hefði Saddam verið gerður að píslarvotti. Maliki greindi einnig frá því að á næstu dögum myndu hersveitir hans loks láta sverfa til stáls í baráttunni við uppreisnarmenn súnnía og dauðasveitir sjía sem virðast halda landinu í heljargreipum.

Við þá baráttu munu þær njóta liðsinnis Bandaríkjahers en George Bush mun að öllum líkindum tilkynna um nokkra fjölgun í herliðinu í næstu viku. Erfitt gæti reynst að fá fjárveitingar fyrir því þar sem demókratar sem nú eru í meirihluta í báðum deildum þingsins leggjast eindregið gegn þessum áfromum.

Alger uppstokkun virðist í gangi innan bandaríska stjórnkerfisins í utanríkis- og varnarmálum. Í gær var ákveðið að John Negroponte hætti sem yfirmaður leyniþjónustustofnana ríkisins og tæki í staðinn við embætti aðstoðarutanríkisráðherra, William Fallon verður yfirmaður herja Bandaríkjamanna í Írak og Afganistan í stað John Abizaid, og David Petraeus tekur við herstjórninni í Írak af George Casey.