Maria Sharapova: Ég er sú besta

Vont tap gegn Serenu Williams í úrslitum opna ástralska meistaramótsins í tennis um helgina hefur ekki slegið rússnesku drottninguna Mariu Sharapovu út af laginu. Sharapova er í efsta sæti á nýjum heimslista sem birtur var í morgun og segir hún það ekki vera neina tilviljun.

"Tölfræðin lýgur ekki. Ég stóð mig vel á lokamótum síðasta árs og komst í úrslitin í Ástralíu. Ég á toppsætið skilið og hef hug á að halda mér þar næstu vikur og mánuði," segir Sharapova, sem hirðir toppsætið á heimslistanum af Amelie Mouresmo.

"Auðvitað er maður alltaf vonsvikinn eftir tap. En þegar allt kemur til alls komst ég í úrslit á einu stærsta móti ársins. Ég tapaði en það er engu að síður mjög góður árangur," bætti Sharapova við.