Risarnir saman á sviði

Steve Jobs forstjóri Apple og Bill Gates forstjóri Microsoft munu stíga saman á svið í vor á tækniráðstefnu sem haldin verður á vegum Wall Street Journal í Kaliforníu. Jobs og Gates hafa verið aðalleikarar á tölvuöld í meira en þrjátíu ár. Þeir munu saman fjalla um stafræna byltingu undanfarinna ára og framtíð tækninnar. Þetta er ekki í fyrsta skipti sem Jobs og Gates stíga saman á svið en það gerðu þeir síðast á samskonar ráðstefnu fyrir tveimur árum. Þeir kumpánar hafa löngum eldað grátt silfur saman en með rökum mætti halda því fram að sú samkeppni hafi verið tæknineytendum til góða. Þegar þeir funduðu síðast saman fyrir tveimur árum notaði Jobs tækifærið og kynnti Podcast-tæknina í iTunes og má því búast við því að annar hvor eða báðir kynni eitthvað spennandi til sögunnar á fundinum í Kaliforníu í maí.