Gera lítið úr ágreiningi

Formenn og varaformenn stjórnarflokkanna gerðu lítið úr ágreiningi sínum eftir að hafa verið á fundi í forsætisráðuneytinu í morgun. Engin niðurstaða er enn komin í málið.

Þrátt fyrir að stjórnarsáttmálinn geri ráð fyrir að klásúla um að auðlindir sjávar séu sameign þjóðarinnar, fari inn í stjórnarskrá, var ekki lögð á það áhersla að hálfu stjórnarliða í stjórnarskrárnefnd. Siv Friðleifsdóttir lýsti hinsvegar þeirri skoðun að ef þetta yrði ekki uppfyllt gæti það haft áhrif á stjórnarsamstarfið og hugsanlega þyrfti þá að mynda minnihlutastjórn fyrir kosningar.

Forsætisráðherra segir fundinn hafa farið vel fram og mörg mál hafi verið til umræðu. Og Geir sagði stjórnarsamstarfið ekki í neinni hættu. Og Þorgerður Katrín sagðist ekki taka undir með Sigurði Kára Kristjánssyni þingmanni Sjálfstæðisflokksins sem sagði að heilbrigðisráðherra ætti að segja af sér vegna yfirlýsinga sinna fyrir helgi.