Meistaradeild VÍS í kvöld

Nú eru línur aðeins farnar að skýrast í Meistaradeild VÍS. Búnar eru 3 greinar af níu. Efstur í söfnun stiga til meistaratignar er Þorvaldur Árni eftir góðan árangur í öllum fyrstu þremur greinunum. Reikna má með að hann haldi áfram að ná góðum árangri a.m.k. í næstu tveimur greinum, gæðingafimi og fimmgangi og auki jafnvel forskot sitt í stigasöfnuninni.

Þetta mat er byggt á því að hann teflir fram skörungum í þessum greinum, Rökkva frá Hárlaugsstöðum og Þokka frá Kýrholti, en Þorri vann einmitt fimmganginn á Þokka í fyrra. Á síðasta keppnistímabili skiluðu skeiðgreinarnar Þorra engu. Til að eiga raunverulega möguleika í ár þarf það að breytast.

Þeir sem sækja að Þorra og virðast eiga raunhæfa möguleika á að slást við hann um titilinn eru Siggi Sig, Viðar Ingólfs, Sölvi Sigurðarson, Jói G., Atli og Diddi. Sölvi er nýliði í meistaradeild og verður að segjast að hann hefur komið á óvart með góðri frammistöðu. Byggir hann árangur sinn á hinum magnaða Óða-Blesa. Spurningin er hvort hann hafi jafnoka hans þegar kemur að skeiðgreinunum.

Siggi Sig, Atli og Diddi eru á kunnuglegum slóðum á þessu stigi í meistaradeildinni. Fylgja í humátt, með möguleika á að skjótast fremstir hvenær sem tækifæri gefst. Allir eru þeir kunnir fyrir tækni og útsjónarsemi þegar kemur að skeiðgreinum og verða örugglega skeinuhættir þegar að þeim kemur. Þessir þrír eiga það sameiginlegt að hafa unnið meistaradeildina og þekkja keppnina inn og út. Þeir eiga það líka sameiginlegt að koma gríðarlega sterkir til leiks í kvöld, með margreynda og verðlaunaða gæðinga. Sigurbjörn teflir fram Markúsi en þeir hafa áður sigrað gæðingafimi meistaradeildar.

Jói G. Hefur komið á óvart með frammistöðu sinni. Jafnan fengið hesta að láni á síðustu stundu, en halað inn stigin engu að síður. Verður að telja það honum til tekna sem reiðmanni.

Viðar Ingólfs er vonarstjarna í hestaíþróttum. Fágaður reiðstíll og lipurð í hnakknum fleyta honum áfram. Sigur hans í töltinu var óumdeildur og það eitt sýnir að hann er til alls líklegur enda er töltkeppnin talin erfiðust hestaíþrótta. Viðar á góða möguleika í kvöld með Tuma og hann stendur vel að vígi þegar kemur að fimmgangi. Stóra spurningin varðandi Viðar og möguleika hans á titlinum er hestakostur hans í skeiðgreinunum.

Of snemmt er að fullyrða mikið um úrslit meistaradeildar því enn eru 60 stig í potinum og jafnan hafa úrslit meistaradeildar ráðist í síðasta spretti síðustu greinar.