Arðsamasta vegagerð sem hægt er að ráðast í

Sundabraut er arðsamasta vegagerð sem hægt er að ráðast í á Íslandi samkvæmt umhverfismati Vegagerðarinnar, segir Björn Ingi Hrafnsson stjórnarformaður Faxaflóahafna. Hann segir Sundabraut ekki bara til hagsbóta fyrir Faxaflóahafnir og íbúa á höfuðborgarsvæðinu, því hún muni stytta leiðir umtalsvert og breyta miklu fyrir íbúa á Vesturlandi og Norðurlandi.

Björn Ingi segir arðsemina hins vegar ekki koma að fullu fram fyrr en hún nái alla leið upp á Kjalarnes og Kollafjörð. Ef Sundabraut yrði lögð í einstökum bútum eins og títt væri um framkvæmdir á vegum hins opinbera kæmi arðsemin seinna fram og nýttist færra fólki. En um leið og Sundabraut væri komin alla leið, verði hún þjóðbraut sem ætti eftir að skipta fólkið í landinu geysilega miklu máli.