Pabbi fer frá Playstation

Ken Kutaragi faðir Playstation leikjatölvunnar hjá Sony hefur sagt af sér. Hann starfaði hjá fyrirtækinu síðan 1975. Sony berst nú fyrir því að ná aftur markaðsforystu á leikjatölvumarkaðnum en samkeppnin hefur harðnað verulega.

Einn aðalsamkeppnisaðili Sony, Nintendo, hefur nýlega gefið út afskaplega jákvæðar afkomutölur vegna vinsælda DS, sem er lítil leikjatölva, og Wii, sem er byltingakennd leikjatölva.

Tæknileg vandamál og fjárhagsáætlanir sem ekki hafa staðist hafa meðal annars valdið því að fresta þurfti útgáfu Playstation3. Sem gerði það að verkum að Nintendo Wii og Xbox 360 sátu einar að jólamarkaðnum.

Þegar Playstation3 kom svo loks út hefur gríðarlega hátt verð, næstum helmingi hærra en hjá samkeppnisaðilum, fælt kaupendur frá.