Fullur aðgangur að tölvupósti í símanum

Openhand gerir notendum kleift að ná í tölvupóst í hvaða forritanlega síma sem er. Viðskiptahópurinn stækkar stöðugt.

Openhand er hugbúnaðarfyrirtæki sem sérhæfir sig í samskiptalausnum fyrir farsíma. „Við gerum viðskiptavinum okkar kleift að nálgast allar upplýsingar úr póstkerfum gegnum símann sinn líkt og þeir sætu við tölvuna sína," segir Davíð Stefán Guðmundsson, markaðsstjóri Openhand.

Einn helsti kostur Openhand-póstkerfisins er að hægt er að nota það í hvaða símtæki sem er svo lengi sem það er forritanlegt. „Það er orðin mjög breið lína í dag, sérstaklega hjá Nokia," segir Davíð. „Menn velja sér líka fyrst símtæki, svo viðbótarhugbúnað og því er nauðsynlegt að hægt sé að nýta hugbúnaðinn á sem flestum símtækjum."

Póstforrit í símum vilja oft vera þung í vöfum og einungis bjóða aðgang að þeim upplýsingum sem í símtækinu eru. Davíð segir að svo sé ekki með Openhand. „Með Openhand færðu fullan aðgang að öllum gögnum á léttan hátt," segir Davíð. „Allt snýst þetta um að lækka rekstrarkostnaðinn og að bjóða lausn sem er þægileg viðbót við farsímann án þess að kosta of mikið."

Openhand er einnig hægt að setja á fartölvuna og komast í tölvupóstinn með aðstoð símans hvar sem símasamband er. „Þú þarft ekki að tengjast gegnum háhraðanet sem er bæði dýrara og erfiðara," segir Davíð. „Þetta er því mjög nett leið ef maður þarf að nálgast póstinn sinn í bústaðnum eða á hótelherbergi."

Openhand er með starfstöðvar á Íslandi, Bretlandi, Ungverjalandi og Þýskalandi og samstarfsaðila í Skandinavíu og Suður-Afríku. „Það liggur 17 ára starfsreynsla að baki fyrirtækinu og viðskiptahópurinn stækkar stöðugt," segir Davíð að lokum.