525.000 iPhone símar seldir

Apple seldi 525.000 iPhone síma í Bandaríkjunum fyrstu söluhelgina. Símarnir eru einungis fáanlegir í verslunum Apple og AT&T vestanhafs.

Það var Los Angeles Times sem greindi frá þessu í morgun. Fregnir herma að tækið haf selst upp í um helmingi Apple verslana á föstudaginn sem var fyrsti söludagurinn.

Goldman Sachs segir að salan hafi verið meiri um helgina, eða allt að 700,000 stykki.

iPhone er símtæki frá Apple sem hægt er að vafra um internetið á og hlusta á mp3 skrár. Um tvö prósent þeirra sem keyptu tækið hafa lent í vandræðum með að virkja þjónustuna fyrir símann, að sögn heimildamanna.

Evrópubúar fá þó ekki tækifæri til að nota símann fyrr en seint á þessu ári, eða í byrjun þess næsta. Ástæðan er að síminn er læstur við farsímakerfi AT&T í Bandaríkjunum, og aðeins seldur gegn tveggja ára samningi. Einnig þarf að virkja símann í gegnum verslun iTunes, og aðeins ef viðkomandi er með bandarískt heimilisfang.