Bandarískar vísitölur á uppleið

Gengi hlutabréfa hækkaði nokkuð við opnun markaða í Bandaríkjunum í dag eftir lækkun síðustu tvo daga. Lækkunin í gær skýrist af taugatitringi vegna frétta um samdrátt á fasteignamarkaði í Bandaríkjunum og lækkunar á fasteignaverði. Nú virðist sem verðlækkunin hafi náð til fasteigna í dýrari kantinum.

Nokkurs titrings hefur gætt vestanhafs í vikubyrjun eftir að félag fasteignasala greindu frá því að fasteignir á söluskrá hafi ekki verið fleiri í sextán ár auk þess sem fasteignaverð sé enn á niðurleið vestra. Það fer þó eftir svæðum en aukning hefur verið í sölu fasteigna á einstökum svæðum.

Nýjustu fregnir herma að lækkun á fasteignaverði hafi nú náð til fasteigna í dýrari kantinum. Ástæður þess eru sú að fjármálafyrirtæki eru tregari nú en áður að veita fasteignalán vegna hræringa á markaðnum. Þetta hefur skert aðgengi fólks í kauphugleiðingum að lánsfé verulega, að sögn fréttastofunnar Associated Press.

Dow Jones-vísitalan hefur hækkað um rúm 0,6 prósent það sem af er dags. Sömu sögu er að segja af Nasdaq. S&P-vísitalan hefur hins vegar hækkað um tæp fimm prósent.