Næstu gjalddagar 2010

„Við erum ekki með gjalddaga á bakinu þar til árið 2010. Það er langur tími í dag," segir Björn Sigurðsson, framkvæmdastjóri afþreyingafyrirtækis­ins Senu. Hann segir fyrirtækið í góðri stöðu á íslenskum afþreyingarmarkaði.

Eins og kunnugt er keypti Sena Skífuna af Árdegi um síðustu mánaðamót. Sena heyrir undir 365 efh. Undir samstæðuhattinum eru sömuleiðis 365 miðlar, sem Jón Ásgeir Jóhannesson og hópur stjórnarteymis keyptu um svipað leyti.

Fjárfestarnir yfirtóku skuldir 365 upp á allt að 4,9 milljarða auk þess sem reiðufjárgreiðsla upp á 1,5 milljarða verður nýtt til að lækka skuldir. Engin lántaka var vegna kaupa á Skífunni en fastafjármunir og lager koma á móti þeim birgjaskuldum sem eru yfirteknar, samkvæmt upplýsingum frá Ara Edwald, forstjóra 365.

Eftir sölu 365 miðla stendur Sena og 63 prósenta hlutur í EFG eftir í samstæðunni. Samþykki Samkeppniseftirlitið kaup Senu á Skífunni verða eftirstandandi skuldir þrír milljarðar króna. Stærstu hlutinn er á gjalddaga í upphafi árs 2010.