Bankamál vísir að Alonso fari til Ferrari

Santander bankinn spænski hyggst auglýsa hjá Ferrari frá árinu 2010 og margir spá í hvort það sé vísir af komu Fernando Alonso til Ferrari. Alonso er með samning við Renault til loka ársins 2010.

Felipe Massa og Kimi Raikkönen er einnig með samning til loka 2010 við Ferrari umræða um áhuga Alonso á Ferrari hefur alltaf komið upp annað slagið. Emilio Botin, forseti Santander bankans staðfesti að bankinn myndi færa sig yfir til Ferrari. Bankinn hefur verið stuðningsaðili McLaren frá því Alonso gekk til liðs við liðið 2007. Allt fór þó upp í loft á milli Alonso og McLaren og hann rauf 3 ára samning í lok 2007.

"Alonso er besti ökumaður í heimi og við vildum gjarnan vinna með honum á ný. En við sjáum ekki um val á ökumönnum hjá Ferrari…", sagði bankastjórinn Botin.

Frammistaða Raikkönen hjá Ferrari var ekki upp á marga fiska í ár, samanborðið við 2007 þegar hann varð meistari. Raikkönen viðurkenndi að hann hefði misst áhugann um tíma, en kveðst mæta sterkur til leiks á næsta ári. Á meðan bíður Alonso síns tíma og telur Renault til alls líklegt með nýjum reglum. Hann vann tvo sigra á þessu ári.