Olíuverðið komið í 95 dali á tunnu

Heimsmarkaðsverð á hráolíu hefur lækkað um tæpa fjóra bandaríkjadali í dag og kostar tunnan nú 94,8 dali í Bandaríkjunum. Efasemdir eru um að björgunaraðgerðir bandarískra stjórnvalda nái að koma stöðugleika á fjármálamörkuðum og spá menn því að enn eigi eftir að harðna í ári með enn minni eftirspurn eftir olíu í Bandaríkjunum en nú um stundir, samkvæmt fréttastofu Associated Press. Samkvæmt vikulegri skýrslu bandaríska orkumálaráðuneytisins sem birt var í gær kemur fram að olíubirgðir vestanhafs jukust um 4,3 milljónir tunna á milli vikna í síðustu viku, eða um 1,5 prósent. Þar af jukust eldsneytisbirgðir um 0,5 prósent. Þetta er í samræmi við væntingar og þykja sanna að dregið hafi úr einkaneyslu samhliða þrengingum í efnahagslífinu vestanhafs. Olíuverðið fór hæst í 147 dali á tunnu í júlí síðastliðnum.