Ferdinand: Scholes er ótrúlegur

Rio Ferdinand, fyrirliði Manchester United, segir að agaður leikur og augnablik af snilld frá Paul Scholes hafi gert gæfumuninn í kvöld þegar enska liðið tryggði sér sæti í úrslitaleik Meistaradeildarinnar.

"Það er erfitt að koma þessu í orð, en stuðningsmennirnir spiluðu stórt hlutverk í kvöld. Þeir voru frábærir. Við þurftum að hafa mjög mikið fyrir þessu en náðum að landa sigrinum," sagði Ferdinand eftir leikinn.

Hann var því næst spurður hvað hefði gert gæfumuninn fyrir United í kvöld. "Agaður leikur og snilld Paul Scholes. Þvílíkt mark hjá honum. Svo sýndum við mikla seiglu og börðumst saman," sagði fyrirliðinn.

Honum er alveg sama hvort United fær Liverpool eða Chelsea í úrslitum.

"Nú erum við komnir í úrslit og þurfum bara að bíða eftir því hvaða liði við mætum þar. Mér er sama hvort liðið við fáum - við verðum tilbúnir," sagði Ferdinand.