Gengi hlutabréfa í Bakkavör hækkaði um 2,4 prósent í upphafi viðskiptadagsins í Kauphöll Íslands í dag. Á sama tíma lækkaði gengi 365 um 1,74 prósent í kjölfar 4,55 prósenta hækkunar í gær.
Önnur félög sem hafa hækkað eru Exista, sem hefur farið upp um 0,7 prósent, Kaupþings, sem hefur hækkað um 0,52 prósent, Atlantic Airways, sem hefur hækkað um 0,46 prósent, og Glitnir, sem hefur hækkað um 0,31 prósent.
Gengi Eimskipafélagsins hefur lækkað frekar í dag, eða um rúmt prósent. Þá hefur gengi bréfa í Össuri lækkað um 0,32 prósent, í Straumi um 0,3 prósent og í Landsbankanum um 0,21 prósent.
Úrvalsvísitalan hefur hækkað um 0,21 prósent og stendur hún í 4.518 stigum.
