Sampo og Storebrand falla hratt

Gengi hlutabréfa í finnska fjármálafyrirtækinu Sampo hefur fallið um 5,9 prósent í dag og Storebrand um 7,9 prósent. Kaupþing og Exista eiga 25 prósenta hlut í Storebrand en Exista seldi tæpan tuttugu prósenta hlut í Sampo í gær. Exista seldi hlutinn á 11,5 evrur á hlut með ríflega 20 prósenta afslætti frá lokagengi bréfa í félaginu á mánudag. Gengi stendur nú, að viðbættu falli dagsins, í 11,78 evrum á hlut. Gengi Storebrand stendur í dag í 21 norski krónu á hlut. Í gær féll gengi bréfa í félaginu 14 prósent. Það féll um 40 prósent í síðasta mánuði. Haft var eftir Nils Christian Qyen hjá greiningardeild First Securitas á vefsíðunni E24.no í gær að ástandið á Íslandi skýri að mestu fall Storebrand. Fallið er nokkuð í samræmi við þróun mála á norrænum hlutabréfamörkuðum í dag. Þannig hefur C-20 vísitalan í kauphöllinni í Kaupmannahöfn í Danmörku fallið um 8,17 prósent, vísitala hlutabréfa á aðallista í Ósló í Noregi fallið um 8,8 prósent, í Svíþjóð um 4,6 prósent og í Helsinki í Finnlandi um 3,6 prósent.