NBA í nótt: Tíundi sigurleikur Cleveland í röð

Níu leikir fóru fram í NBA-deildinni í körfubolta síðustu nótt. Hér að neðan má lesa helstu upplýsingar um þá alla.

San Antonio Spurs lagði Atlanta Hawks 95-89. Manu Ginobili skoraði 27 stig fyrir San Antonio en stigahæstur í liði Atlanta var Joe Johnson með 29 stig.

Los Angeles Lakers átti í vandræðum með Phoenix Suns en hrósaði á endanum sigri 115-110. Pau Gasol var með 28 stig fyrir Lakers en Matt Barnes skoraði 25 stig fyrir Phoenix.

Denver Nuggets hrósaði sigri gegn Minnesota Timberwolves 116-105. Carmelo Anthony skoraði 33 stig í þriðja leikhluta og jafnaði NBA-met yfir flest stig í einum fjórðung. Anthony skoraði alls 45 stig í leiknum. Stigahæstur í liði Minnesota voru Randy Foye og Al Jefferson með 26 stig hvor.

Toronto Raptors vann Indiana Pacers 101-88. Jason Kapono skoraði 25 stig og tók 8 fráköst fyrir Toronto og þá átti Chris Bosh góðan leik og skoraði 21 stig og tók 10 fráköst. Danny Granger var með 22 stig fyrir Indiana og Marquis Daniels 21 stig.

New York Knicks vann útisigur gegn New Jersey Nets 121-109. Al Harrington skoraði 39 stig fyrir New York, hans hæsta skor á tímabilinu. Tim Thomas átti einnig besta leik sinn á tímabilinu en hann var með 26 stig. Í liði New Jersey skoraði Devin Harris 32 stig.

New Orleans bar sigurorð af Charlotte 105-89. Það var liðsheildin sem færði New Orleans sigurinn. Peja Stojakovic og David West voru með 17 stig hvor, Morris Peterson 16 og Chris Paul 15 stig og 15 stoðsendingar. Fyrir Charlotte skoraði DJ Augustin 28 stig.

Cleveland Cavaliers vann sinn tíunda leik í röð þegar liðið lagði Philadelphia á útivelli 101-93. LeBron James var með 29 stig og Mo Williams 27 í liði Cleveland. Andre Iquodala skoraði 27 stig fyrir Philadelphia.

Memphis færði Oklahoma City sitt 22. tap á leiktíðinni þegar liðið vann 108-102 sigur. Oklahoma leiddi eftir fyrsta leikhluta í fyrsta sinn á leiktíðinni en Kevin Durant var stigahæstur hjá liðinu með 28 stig. Rudy Gay var með 22 stig fyrir Memphis Grizzlies.

Golden State er að komast aftur á beinu brautina og vann sinn annan leik í röð eftir langa taphrinu. Golden State vann Milwaukee Bucks 119-96. Stephen Jackson var með 21 stig fyrir sigurliðið en Michael Redd 27 stig fyrir Bucks.