Nesta að hætta?

Fjölmiðlar á Ítalíu greina frá því í dag að svo gæti farið að ítalski miðvörðurinn Alessandro Nesta hjá AC Milan muni leggja skóna á hilluna í lok leiktíðar.

Nesta er almennt álitinn einn besti miðvörður Ítala síðastliðinn áratug, en þrálát meiðsli hafa hvað eftir annað sett strik í reikninginn hjá þessum frábæra knattspyrnumanni.

Nesta er 32 ára gamall og hætti að gefa kost á sér í landsliðið á síðasta ári. Hann hefur enn á ný verið að glíma við meiðsli í sumar og talið er að hann komi jafnvel ekki við sögu á þessu ári. Nesta er heldur ekki í leikmannahópi Milan í Evrópukeppni félagsliða.