Porto bannað að taka þátt í Meistaradeildinni

Fyrrum Evrópumeistarar Porto fá ekki að taka þátt í Meistaradeildinni næsta tímabil. Þetta hefur stjórn UEFA ákveðið en Porto er sakað um að hafa reynt að hagræða úrslitum í Portúgal.

Um er að ræða tvo leiki tímabilið 2003-4 er liðið lék undir stjórn Jose Mourinho. Porto varð meistari í Portúgal á nýliðnu tímabili. Liðið missti sex stig í refsingu en það hafði ekki áhrif á lokastöðuna í deildinni.

Félagið hefur gefið út að allt verði reynt til að breyta þessari ákvörðun UEFA.