Óvæntur halli á japönskum vöruskiptum

Halli var á vöruskiptum upp á 324 milljarða jena, jafnvirði 286 milljarða króna, í Japan í síðasta mánuði, samkvæmt útreikningum hagstofu landsins. Niðurstöðurnar komu mjög á óvart en þykja vísbendingar um að harðna muni í ári í landi hinnar rísandi sólar á næstu misserum. Til samanburðar voru vöruskipti jákvæð um 743,6 milljarða jena á sama tíma í fyrra. Þetta er í fyrsta sinn sem halli mælist á vöruskiptum í Japan síðan í nóvember árið 1982, að sögn breska ríkisútvarpsins (BBC) sem þó tekur fram janúarmánuður sé undanskilinn þar sem vöruskipti séu vart marktæk eftir áramótin. Útflutningur jókst um 0,3 prósent í mánuðinum á móti 17,3 prósenta aukningu í verðmæti innflutnings. Mestu munar um samdrátt í útflutningi á bílum til Bandaríkjanna en útflutningur yfir hafið dróst saman um 21 prósent. Samfara því hefur kostnaður við kaup á olíu og verð á innfluttum varningi hækkað mikið á alþjóðlegum mörkuðum upp á síðkastið.