Góð jól hjá HMV

Breska bóka- og tónlistarverslunin HMV átti góð jól, að sögn stjórnenda hennar en salan jókst um 9,4 prósent á milli ára í desember. Þetta er nokkuð annað hljóð en hjá öðrum verslunum í Bretlandi en í heildina talið dróst velta saman á milli ára.

Simon Fox, forstjóri HMV, segir eftirspurn eftir DVD-mynddiskum og tölvuleikjum hafa verið sérlega mikla um jólin. Mest seldu myndirnar voru kvikmyndin um Simpson-fjölskylduna, Bourne Ultimatum og High School Musical 2. Metsölubækurnar voru hins vegar bækur um eldamennsku eftir Nigellu Lawson og Jamie Oliver. Þá jókst sömuleiðis sala í netverslun HMV nokkuð á milli ára, samkvæmt upplýsingum breska ríkisútvarpsins.

HMV rekur 422 verslanir um heim allan og hefur att miklu kappi gegn niðurhali á tónlist á netinu og aðrar verslanir sem sérhæfa sig bæði í sölu á tónlist og bókum en byrjuðu að endurskipuleggja reksturinn á síðasta ári.