Ísland tapaði fyrir Möltu

Íslenska landsliðið tapaði sínum öðrum leik á æfingamótinu á Möltu. Það tapaði fyrir heimamönnum í kvöld en leikurinn endaði 1-0 fyrir Maltverja.

Íslenska liðinu gekk illa að byggja upp góðar sóknir í leiknum. Möltumenn náðu að brjóta ísinn á 18. mínútu með skoti frá vítateig sem var óverjandi fyrir Fjalar Þorgeirsson í markinu. Það reyndist eina mark leiksins.

Samkvæmt vefsíðu KSÍ sótti íslenska liðið nokkuð stíft á lokakafla leiksins og björguðu heimamenn m.a. á marklínu í eitt skiptið.

Ísland tapaði um helgina fyrir Hvíta Rússlandi og hefur enn ekki tekist að finna leiðina í mark andstæðingana á mótinu. Lokaleikur íslenska liðsins á mótinu er á miðvikudaginn gegn Armeníu.

Armenía vann Hvíta Rússland fyrr í kvöld 2-1 á þessu æfingamóti og er með fullt hús eftir tvær umferðir.

Staðan á mótinu eftir tvær umferðir:

1. Armenía - 6 stig

2. Hvíta Rússland - 3 stig

3. Malta - 3 stig

4. Ísland - 0 stig