Kosið um fjögur sæti í stjórn KSÍ

Fimm hafa boðið sig fram í þau fjögur sæti sem eru laus í stjórn Knattspyrnusambands Íslands.

Ársþing KSÍ fer fram á morgun í höfuðstöðvum KSÍ en ekki er kosið um formann sambandsins í ár. Formaður er kjörinn til tveggja ára í sinn og var Geir Þorsteinsson kjörinn formaður í fyrra.

Af þeim fjórum sem ganga úr stjórn KSÍ í ár gefa þrír kost á sér til endurkjörs. Aðeins Ástráður Gunnarsson frá Reykjanesbæ gefur ekki kost á sér á nýjan leik.

Ingibjörg Hinriksdóttir, Kópavogi, Jón Gunnlaugsson, Akranesi og Lúðvík S. Georgsson, Reykjavík gefa kost á sér á nýjan leik en Jón er ritari stjórnar og Lúðvík varaformaður hennar.

Þar að auki gefa þeir Björn Guðbjörnsson frá Reykjavík og Rúnar Vífill Arnarson frá Keflavík kost á sér til stjórnarsetu.

Þá hefur Halldór B. Jónsson ákveðið að draga sig úr stjórn KSÍ vegna veikinda. Hann hefur lengi gegnt embætti varaformanns stjórnarinnar.

Kosið verður í sæti hans til eins árs og hefur Þórarinn Gunnarsson frá Reykjavík einn boðið sig fram í þeirri kosningu.

Á hverju ársþingi er kosið um aðalfulltrúa landsfjórðungunna og hafa allir þeir sem nú gegna því embætti gefið kost á sér til áframhaldandi starfa.

Eins árs kjörtímabili varamanna í aðalstjórn KSÍ lýkur nú og verður kosið á ný á ársþinginu í þau sæti. Jóhannes Ólafsson frá Vestmannaeyjum, Kjartan Daníelsson og Þórarinn Gunnarsson frá Reykjavík eru fráfarandi varamenn og bjóða sig aftur fram til áframhaldandi setu auk Sigvalda Einarssonar frá Kópavogi.