Margir ökumenn ósáttir við Hamilton

Fjöldi ökumanna létu það í ljós í Kína í dag að þeir eru ósáttir við akstursmáta Lewis Hamilton og það sem gerðist í Japan fyllti mælinn hjá mörgum.

"Ég er ósáttur við Hamilton, þó ég hafi ekki lent í árekstri við hann. Hann hélt aftur af mér í rúma tvo hringi, þó hann væri hring á eftir og ég væri í foyrstu", sagði Jarno Trulli hjá Toyota í dag.

"Þetta kostaði mig dýrmætan tíma, þannig að ég missti Nelson Piquet framúr mér. Hamilton var síðastur og hefði átt að gæta að sér og fylgjast með í speglunum."

Mark Webber sagðist ætla að ræða við Charlie Whiting keppnisstjóra á fundi ökumanna á föstudagskvöld. Webber telur að Hamilton hafi skapað mikla hættu í fyrstu beygjunni í Japan.

"Það varð dauðaslys á Monza brautinni árið 2000, eftir að ökumenn óku of geyst á bremsukafla brautarinnar. Þess vegna þarf að skoða þetta mál vandlega", sagðí Webber.

Hamilton var refsað fyrir gáleysislegan akstur í Japan, en McLaren menn voru ekki sáttir við dóminn eftir keppnina, þó Hamilton viðurkenndi að hann hefði gert mistök.

"Hamilton er stórkostlegur ökumaður, en hann hefur galla rétt eins og kosti. Hann braut á mér á Monza brautinni og fleiri ökumönnum og slapp með án refsingar. Hamilton var villtur í fyrstu beygjunni á Fuji brautinni. Það hefði getað orðið óhapp ef aðrir ökumenn hefðu ekki gætt að sér. Það þurfa allir að læra. Það gerði Tiger Woods í golfinu, það gerði líka Roger Federer í tennis. Hamilton er að ganga í gegnum það sama", sagði Webber.

Ítarleg umfjölllun verður um Formúlu 1 og akstursmáta Hamilton og dóma íþróttinni í þættinum Rásmarkið kl. 20.00 í kvöld á Stöð 2 Sport.