Haukar á toppinn eftir stórsigur á Fram

Fjórir leikir fóru fram í N1 deild karla í handbolta í kvöld. Haukar eru komnir á toppinn eftir öruggan útisigur á Fram í uppgjöri toppliðanna 30-20.

Sigurbergur Sveinsson skoraði 9 mörk í liði Hauka en Guðjón Drengsson skoraði 5 mörk fyrir Safamýrarliðið.

Valsmenn burstuðu Akureyringa 32-21 á Hlíðarenda þar sem Fannar Friðgeirsson skoraði 10 mörk fyrir Valsmenn og Arnór Malmquist 9.

FH vann stórsigur á Stjörnunni 34-22 og þá vann Víkingur sigur á HK 27-24.

Haukar eru sem fyrr segir á toppnum með 18 stig, Valsmenn eru komnir í annað sætið með 17 og FH er í því þriðja með 16 stig líkt og Fram en á leik til góða.