Iniesta tæpur fyrir úrslitaleikinn

Óvíst er hvort spænski landsliðsmaðurinn Andres Iniesta hjá Barcelona muni geta spilað úrslitaleik meistaradeildarinnar þann 27. maí eftir að hann meiddist í 3-3 jafntefli Barcelona og Villarreal um helgina.

Iniesta er meiddur á læri og yrði það vissulega blóðtaka fyrir Katalóníumenn ef hann gæti ekki spilað úrslitaleikinn. Iniesta tryggði liðinu sæti í úrslitum með dramatísku marki gegn Chelsea í undanúrslitunum.

Thierry Henry er spurningamerki fyrir úrslitaleikinn vegna hnémeiðsla og þegar er ljóst að þeir Eric Abidal og Daniel Alves úr vörninni þurfa að taka út leikbann.