Töframarkið klárlega bleiku skónum að þakka

Andri Fannar Stefánsson skoraði stórbrotið mark í sigri KA á Þór í nágrannaslagnum á Akureyri í kvöld. Hann smellhitti boltann þegar hann kom svífandi úr loftinu, þrumaði honum með ristinni í stöngina og inn, fjær. Andri er fæddur árið 1991 og er mikið efni. Hann var maður leiksins á vellinum í kvöld.

Andri skartaði bleikum skóm sem hann hefur notað í vetur og vor. „Þeir eru flottir," glotti Andri en vill alls ekki kenna þá við Nicklas Bentner, leikmann Arsenal, sem spilar einnig í bleikum skóm, enda er Andri harður stuðningsmaður Liverpool.

„Markið var klárlega bleikum skónum að þakka. Ég sá hann allan tímann inni," hélt Andri áfram. „Þessi sigur er nauðsynlegur fyrir framhaldið hjá okkur," sagði Andri og viðurkenndi að það væri sérstaklega sætt að vinna erkifjendurna í Þór.

„Það var liðsheildin og baráttan sem skóp þennan sigur. Það skiptir engu máli hvort liðið er betra í fótbolta í svona leikjum en mér fannst við betri allan leikinn. Miklu betri," sagði Andri sem kveður KA menn ætla að byggja á sætum sigri á Þór í kvöld.