Inter og Roma skildu jöfn í markaleik

Inter Milan og Roma gerðu 3-3 jafntefli í fjörugum kvöldleik í ítölsku A-deildinni og fyrir vikið er forysta meistaranna orðin sjö stig á Juventus sem er í öðru sæti.

Rómverjar byrjuðu betur í kvöld og komust í 2-0 með mörkum Daniele De Rossi og John Arne Riise í fyrri hálfleik. Mario Balotelli minnkaði muninn í 2-1 á 50. mínútu áður en Matteo Brighi kom Roma í 3-1 skömmu síðar.

Balotelli minnkaði svo muninn með marki úr vítaspyrnu og markahrókurinn Hernan Crespo tryggði svo Inter 3-3 jafntefli með marki ellefu mínútum fyrir leikslok.

Inter hefur 60 stig á toppi deildarinnar, Juventus hefur 53 stig, AC Milan 48 og Fiorentina er með 46 stig í fjórða sætinu. Þar á eftir koma Genoa með 45 og Roma með 44 stig.