Umspil á opna breska - Watson mistókst að tryggja sér sigurinn

Bandaríkjamennirnir Stewart Cink og Tom Watson munu spila fjögurra holu umspil um sigurinn á opna breska meistaramótinu í golfi.

Watson átti möguleika á að tryggja sér sigurinn á 18. holunni en hann þrípúttaði og þarf því að vinna umspilið ætli hann að bæta öll metin sem falla vinni hann sitt sjötta opna breska meistaramót.

Watson lék lokahringinn á 72 höggum eða tveimur höggum yfir pari en Cink lék síðasta hringinn á 69 höggum eða eitt högg undir pari.

Chris Wood og Lee Westwood urðu jafnir í þriðja sæti einu höggi á eftir þeim Cink og Watson.