Victoria til í að flytja til Mílanó

David Beckham hefur ekki farið leynt með þá ósk sína að hann vill vera til frambúðar hjá AC Milan. Fréttir bárust af því að Victoria, eiginkona hans, væri þó ekki til í að yfirgefa Los Angeles en þær fréttir virðast ekki réttar.

„Ég er ánægð því ég veit að hann er ánægður í Mílanó. Það er frábært að sjá að hann er strax byrjaður að skora mörk. Ég stekk upp af gleði í hvert skipti sem David skorar," sagði Victoria.

„Ég er mjög hrifin af Mílanó og þar þekki ég mikið af fólki. Sérstaklega í tískuheiminum. Borgin er lífleg, full af orku og ástríðu. Maturinn er góður og það er í raun engin ástæða til að líka ekki við Mílanó."

Synir þeirra hjóna; Brooklyn, Romeo og Cruz, eru í skóla í Los Angeles. Victoria segist þó tilbúin til að yfirgefa borgina ef David nær að fá sig lausan frá LA Galaxy.