Fletcher fær ekki að spila úrslitaleikinn

Miðjumaðurinn Darren Fletcher hjá Manchester United fær ekki að spila úrslitaleikinn í meistaradeildinni í lok mánaðar. Þetta var staðfest í dag eftir að áfrýjun United á rauða spjaldið hans í undanúrslitunum var hafnað.

Sumum þótti dómarinn Roberto Rosetti hafa rekið Fletcher ranglega af velli og því var ákvörðun hans áfrýjað, en Knattspyrnusamband Evrópu sá ekki ástæðu til að breyta dómnum.

Þeir Eric Abidal og Daniel Alves hjá Barcelona fá heldur ekki að spila úrslitaleikinn. Abidal fékk rautt í undanúrslitaleiknum og Alves tekur út leikbann vegna gulra spjalda.