Leonardo hjá AC Milan: Ánægður með liðið mitt eins og það er í dag

Leonardo, þjálfari AC Milan, er ekkert að hafa áhyggjur af því þótt að félagið hans ætli ekki að versla sér nýja leikmenn þegar félagsskiptaglugginn opnar í næsta mánuði.

AC Milan dróst í dag á móti Manchester United í sextán liða úrslitum Meistaradeildarinnar en þá verður liðið komið með David Beckham sem þeir fá á láni frá Los Angeles Galaxy.

„Við getum ekki farið á leikmannamarkaðinn. Ég er mjög bjartsýnn á því að við getum unnið leiki með þá leikmenn sem við höfum. Ég er ánægður með liðið mitt eins og það er í dag ," sagði Leonardo á blaðamannafundi í dag.

Auk þess að fá Beckham á láni þá mun ítalska liðið fá til sín Ganamanninn Dominic Adiyiah sem hefur spilað með norska liðinu Fredrikstad undanfarin tvö ár.