Wenger: Við stjórnuðum leiknum allan tímann

Arsenal vann 2-0 sigur gegn Olympiakos í riðlakeppni Meistaradeildarinnar í kvöld á Emirates-leikvanginum í Lundúnum. Robin van Persie og Andrei Arshavin skoruðu mörkin fyrir heimamenn sem hafa unnið báða leiki sína í riðlakeppninni til þessa.

Knattspyrnustjórinn Arsene Wenger hjá Arsenal hrósaði leikmönnum sínum fyrir góða spilamennsku og mikla þolinmæði.

„Ég er gríðarlega ánægður með leikinn. Við vorum frábærir í fyrri hálfleik þrátt fyrir að okkur hafi ekki tekist að skora og það er oft erfitt upp á seinni hálfleikinn að gera. Við urðum dálítið þreyttir í síðari hálfleik en við pössuðum okkur að gera ekki mistök og halda haus og vera þolinmóðir.

Mér fannst við stjórna leiknum allan tímann og sem betur fer náðum við að opna þá á síðasta stundarfjórðungnum og skora tvö mörk. Grikkirnir voru annars skipulagðir og baráttuglaðir og gerðu okkur mjög erfitt fyrir," sagði Wenger í leikslok í kvöld.