KA vann grannaslaginn gegn Þór

KA fór með verðskuldaðan sigur úr grannaslagnum gegn Þór á Akureyrarvelli í kvöld. Andri Fannar Stefánsson skoraði líklega mark ársins í 1. deildinni og kom KA yfir í fyrri hálfleik og Norbert Farkas bætti við öðru marki í seinni hálfleik í 2-0 sigri.

Leikurinn var leiðinlegur á að horfa lengst af. Hann var hægur og barátta einkenndi hann. Það kom þó líklega fáum á óvart enda andar kalt á milli félaganna hér á Akureyri.

 Í raun gerðist fátt markvert áður en Andri Fannar skoraði töframarkið sitt. Í skærbleikum skóm tók hann bolta á lofti sem skallaður hafði verið burt frá marki Þórs, þrumaði honum viðstöðulaust með föstu skoti í stöngina og inn. Hreint magnað mark hjá stráknum sem var klárlega maður leiksins í kvöld. Þrátt fyrir ungan aldur stjórnaði hann miðjuspili KA frá A til Ö.

Hvort lið fékk eitt fínt færi en bæði skotin voru af markteig og bæði voru þau framhjá. Staðan í hálfleik var 1-0 fyrir KA en Þórsarar voru meira með boltann án þess að ná að skapa sér góð færi.

Svipuð staða var í seinni hálfleik. Þórsarar freistuðu þess að jafna og næst því komst þjálfarinn sjálfur Lárus Orri Sigurðsson en Sandor Matus, hinn kattliðugi markmaður KA, varði vel.

Norbert Farkas gerði út um leikinn þegar hann skoraði með skoti í þaknetið eftir aukaspyrnu í teig Þórs, við gríðarlegan fögnuð heimamanna. Um 1000 manns voru á Akureyrarvelli í kvöld.

Vörn Þórs opnaðist mikið undir lokin þegar liðið reyndi að klóra í bakkann og KA fékk fleiri færi til að bæta við en Þór að minnka muninn. Sanngjarn sigur KA, 2-0, staðreynd.