Graham Poll: Þetta var hárréttur dómur

Fyrrum dómarinn Graham Poll hefur komið ítölskum kollega sínum Roberto Rosetti til varnar eftir meistaradeildarleikinn í gær og segir hann hafa tekið hárrétta ákvörðun þegar hann dæmdi víti á Manchester United og sendi Darren Fletcher af velli.

Manchester United tók Arsenal í kennslustund á Emirates í gær og það eina sem skyggði á frábæran sigur United var sú staðreynd að nú verður Skotinn Darren Fletcher í leikbanni í úrslitaleiknum í Róm.

"Rosetti átti góðan leik og getur vel réttlætt vítið sem hann dæmdi á Darren Fletcher. Þegar sjónvarpsmenn og leikmenn segja "hann tók boltann - þetta getur ekki verið víti", hafa þeir rangt fyrir sér," sagði Poll í pistli sínum á Daily Mail eftir leikinn.

"Þó Fletcher hafi náð að koma aðeins við boltann, mat Rosetti það þannig að leikmaðurinn hafi ekki komist hjá því að fella andstæðing sinn í leiðinni og því gat hann ekki annað en vísað honum af velli."