Magnús: Ákveðinn í að eiga ekki tvo slaka leiki í röð

Magnús Erlendsson átti stórleik í marki Fram þegar liðið vann ansi mikilvægan sigur á Seltjarnarnesi í kvöld. Magnús varði 27 skot í leiknum.

„Liðið mætti gríðarlega vel undirbúið í þennan leik. Þvílík barátta frá fyrstu mínútu í vörninni," sagði Magnús eftir leik.

„Við vorum gríðarlega tilbúnir. Við vorum aðeins ryðgaðir sóknarlega en Grótta spilaði bara fantavörn. Þeir hafa hávaxna varnarmenn en við lágvaxna sókn. Þetta var frábær leikur, við vorum bara ákveðnari," sagði Magnús sem hefur leikið sérlega vel eftir áramót.

„Ég skeit á mig í síðasta leik og vildi ekki eiga tvo slaka leiki í röð svo ég kom vel undirbúinn í dag."

Fram mætir Stjörnunni í lokaumferðinni á fimmtudag í úrslitaleik um fall. „Það er allt eða ekkert leikur fyrir okkur og við verðum að mæta ákveðnir í hann. Þetta er bara bikarúrslitaleikur," sagði Magnús.