Þjálfari Braga: Arsenal átti aldrei að fá víti

Arsene Wenger, stjóri Arsenal, kvartaði yfir því að leikmenn Braga hefðu verið grófir í kvöld en Domingos Paciencia, þjálfari Braga, nennti ekki neinu orðastríði við Wenger eftir leik liðanna í kvöld.

"Ég vil ekki tjá mig um þessa hluti því þetta er hans skoðun," sagði Paciencia.

Hans menn sluppu vel þegar augljóst víti var ekki dæmt á liðið.

"Ég er búinn að sjá þetta í sjónvarpinu. Það var rangstæða áður en brotið átti sér stað. Þannig að Arsenal átti aldrei að fá víti," sagði Paciencia en hans menn eiga enn möguleika á að komast í sextán liða úrslit enda með jafn mörg stig og Arsenal.

"Það verður erfitt en við verðum að trúa því að við getum komist áfram. Leikurinn gegn Shaktar verður mjög erfiður en ég tel okkur eiga möguleika."